Identité
La parora identité vëgn adorada gonot tl Südtirol porvia dla storia de chësta provinzia. L’identité defënn, renforza – y tl medemo tëmp limitëiera ince. Ne sunse nos düc forsc nia de plü co n teritore, n grup linguistich, na portignënza culturala? Por tó ca te na manira lëdia na zitaziun dl filosof Richard David Precht: Che este pa tö – y tan de identités aste pa?
Ci ciamps dla vita é pa importanc por le sentimënt de identité?
Che sunse pa nos “pordërt”?
Sce na porsona dl Südtirol vëgn damanada foradecá o te d’atres perts dla Talia sciöche “ci” che ara se sënt, vëgnel porleplü formulé frases cun “pordërt”: “Pordërt me sënti bëgn talian/taliana, mo nia ma”. O: “Pordërt me sënti todësch/todëscia, mo nia sciöche na porsona che vëgn dala Germania o dal’Austria”. O ince: “Pordërt me sënti ladin/ladina, mo …”. Y n’atra domanda che an se fej é: “Dijon pordërt sudtirolesc o tirolesc, Südtiroler o Tiroler, sudtirolesi o altoatesini?”
